រឿងអប់រំខ្លីៗ៖ តើអ្នកជា ដំឡូង ពងមាន់ ឬ គ្រាប់កាហ្វេ?

កាលពីព្រេងនាយ មានគ្រួសារមួយដែលមានឪពុក និង កូនស្រី រស់នៅក្នុងតំបន់ជាយក្រុង។ ឪពុករបស់កូនស្រីគឺជាអ្នកជំនួញជើងចាស់ដែលមានបទពិសោធរកស៊ីនិងយល់ដឹងពីសង្គមបានច្រើន។

នៅពេលកូនស្រីរបស់គាត់ចាប់ផ្តើមធ្វើការងារ រាល់ពេលបរិភោគអាហារ គាត់តែងតែលឺកូនរអ៊ូអំពីការងារលំបាក បញ្ហាដែលតែងតែជួបប្រទះក្នុងការងារ ការមិនចុះសម្រុងជាមួយក្រុមការងារជាដើម។ បញ្ហាមួយបានដោះស្រាយ បញ្ហាមួយទៀតកើតឡើង ហើយនាងនឿយណាយនឹងអស់កំលាំងក្នុងការប្រឈមនឹងបញ្ហាទាំងនោះទៀតហើត។

ដោយឃើញកូនស្រីមានបញ្ហាច្រើនរហូតដល់ស្រ្តេសម្តងៗ ព្រោះតែកូនទើបតែចូលប្រឡូកក្នុងសង្គមការងារលើកដំបូង នៅថ្ងៃមួយដែលជាថ្ងៃឈប់សម្រាក ឪពុកបានអោយកូនស្រីទៅទិញរបស់៣យ៉ាង គឺ ដំឡូង ពងមាន់ និង គ្រាប់កាហ្វេ។ កូនស្រីមានចំងល់យ៉ាងខ្លាំងថា តើឪពុកចង់ធ្វើម្ហូបអ្វីនៅថ្ងៃនេះ បានជាចង់ទិញរបស់ទាំងនេះ។ ដោយមិនហ៊ានសួរ កូនស្រីបានទៅផ្សារទិញរបស់របរ​ ហើយបន្លែបង្ការ ត្រីសាច់ សម្រាប់ធ្វើម្ហូប។

ពេលមកដល់ផ្ទះ ឪពុកបានអោយកូនស្រីដាំទឹក៣ឆ្នាំងអោយពុះ រួចដាក់ដំឡូងក្នុងឆ្នាំងទី១ ពងមាន់ក្នុងឆ្នាំងទី២ និង កាហ្វេក្នុងឆ្នាំងទី៣។ មួយម៉ោងក្រោយមក ឪពុកបានអោយកូនស្រីយកឆ្នាំងទាំងបី ដាក់អោយត្រជាក់។ ឪពុកសួរកូនស្រីថា​ “តើកូនមានកត់សម្គាល់ឃើញអ្វីនៅក្នុងឆ្នាំងទាំងនេះទេ?” កូនស្រីឆ្លើយថា ឃើញមានសណ្តែកស្ងោរមួយឆ្នាំង ពងមាន់ស្ងោរមួយឆ្នាំង ហើយ នឹងកាហ្វេមួយឆ្នាំង។ កូនស្រីក៏សួរឪពុកថា តើពុកចង់ធ្វើម្ហូបអ្វី?

ឪពុកមើលមុខកូនស្រីមួយសន្ទុះ ហើយក៏និយាយថា ដំឡូងពិតជារឹងមែនទែន តែនៅពេលត្រូវទឹកក្តៅពុះ បែរជាក្លាយជាទន់ជ្រាយទៅវិញ។ រីឯពង់មាន់ដែលមានសម្រករឹងនៅខាងក្រៅ កាន់មិនប្រយ័ត្នអាចបែក បែរជាពេលត្រូវដាក់ក្នុងទឹកក្តៅពុះយូរទៅ បែរជាសម្រកក្លាយជាស្រួយ តែផ្នែកខាងក្នុងបែរជារឹងទៅវិញ។

ចំណែកគ្រាប់កាហ្វេវិញ កូនមានកត់សម្គាល់ទេ? ពេលត្រូវទឹកក្តៅ បែរជាគ្រាប់កាហ្វេប្រែក្លាយទឹកនោះទៅជារបស់ថ្មីវិញគឺកាហ្វេក្តៅដែលមានរស់ជាតិនិងក្លិនឈ្ងុយ​ ទាក់ទាញមនុស្សទាំងពួងអោយចង់ភ្លក់រសជាតិវា។

ដូចគ្នាដែរ នៅក្នុងជីវិតរបស់យើង បញ្ហាប្រៀបបាននឹងទឹកក្តៅដែលកំពុងពុះដូចគ្នាអីចឹង។ ដំឡូង ពងមាន់ និង កាហ្វេសុទ្ធតែឆ្លងកាត់ទឹកដាំពុះ ប៉ុន្តែវាមានប្រតិកម្មត្រលប់ទៅវិញផ្សេងៗគ្នា។

សម្រាប់កូនវិញតើកូនវិញ តើនៅពេលជួបបញ្ហាកូននឹងដោះស្រាយវាដូចម្ត៉េច? តើកូនជាដំឡូង? ពង់មាន់? ឬ ជាកាហ្វេដែលអាចប្តូរទឹកទៅជាកាហ្វេដែលមានក្លិនឈ្ងុយ? ចុះអ្នកអានទាំងអស់គ្នាវិញ តើលោក​ អ្នកជាអ្វីដែរ?

គំនិតអប់រំ៖

•  មនុស្សយើងកើតមកសម្រាប់ដោះស្រាយបញ្ហា មិនមែនគេចពីបញ្ហានោះទេ
• ពេលខ្លះ យើងអាចទន់ជ្រាយឬរឹងមាំទៅតាមបញ្ហាដែលយើងជួបប្រទះ ប៉ុន្តែយើងគួរតែតស៊ូនឹងរៀនពីបញ្ហាទាំងនោះ ដើម្បីអោយយើងអាចបំម្លែងវាទៅជាឱកាសដូចជាកាហ្វេអីចឹង

ដកស្រង់និងកែសម្រួលពី Motivational Life Quote