អ្វីទៅជាទ្រឹស្តី ៨០/២០?

ជាទូទៅ មានទ្រឹស្តីជាច្រើនបង្កើតដោយអ្នកប្រាជ្ញ និង មនុស្សជោគជ័យជាច្រើននៅក្នុងពិភពលោកនេះ ដែលយើងអាចរៀនសូត្របាន ហើយទ្រឹស្តីទាំងនោះក៏បានឆ្លងកាត់ការពិសោធហើយផងដែរ។ ប៉ុន្តែទោះបីជាយ៉ាងណាក៏ដោយ វាក៏មិនអាចអនុវត្តបានចំពោះមនុស្សទាំងអស់ផងដែរដោយសារ កត្តា កាលៈទេសៈ និង ពេលវេលា។ ទោះបីជាដូច្នេះក្តី ការដឹងទ្រឹស្តីកាន់តែច្រើនកាន់តែល្អ ដើម្បីយើងអាចយកមកអនុវត្តក្នុងជីវិតរបស់យើងដើម្បីឈានទៅរកភាពជោគជ័យ និង គោលដៅដែលយើងបានកំណត់។

ថ្ងៃនេះ Letsharekh សូមចែករំលែកនៅទ្រឹស្តី ៨០/២០ ជាចំណេះដឹងហិរញ្ញវត្ថុសម្រាប់អ្នកអានទាំងអស់គ្នា។ អ្វីទៅជាទ្រឹស្តី ៨០/២០? យោងទៅតាមគេហទំព័រ វីគីភីឌា ទ្រឹស្តី ៨០/២០ ឬ ហៅថា ទ្រឹស្តី ភារាតូ (Pareto Principle) គឺជាទ្រឹស្តីមួយដែលបង្ហាញថា រាល់ព្រឹត្តិការណ៍ដែលកើតឡើង ភាគច្រើន លទ្ធផល ៨០ភាគរយនៃព្រឹត្តិការណ៍ទាំងនោះ  កើតចេញពីមូលហេតុ ២០ ភាគរយ។ ទ្រឹស្តីនេះ បានយកទៅអនុវត្តនៅគ្រប់វិស័យ ដូចជា ផ្នែកលក់ (៨០% នៃចំណូល បានពីការលក់ផលិតផលទៅ ២០ភាគរយនៃអតិថិជនទាំងអស់) ការគ្រប់គ្រងដីធ្លី (ដូចជានៅប្រទេសអ៊ីតាលី ៨០ភាគរយនៃផ្ទៃដី ត្រូវបានគ្រប់គ្រងដោយប្រជាជន​ ២០% នៃប្រជាជនទាំងអស់)។

ចុះទាក់ទងនឹងហិរញ្ញវត្ថុវិញ តើទ្រឹស្តីនេះជួយអ្វីបានខ្លះ?

១. ការគ្រប់គ្រងការចំណាយ៖

ប្រសិនបើយើងចង់គ្រប់គ្រងការចំណាយរបស់យើង យើងអាចប្រើទ្រឹស្តីនេះសម្រាប់តាមដានការលើរបស់អ្វីដែលយើងបានចំណាយច្រើនជាងគេ។ ជាទូទៅ ៨០%នៃការចំណាយប្រចាំខែរបស់យើង​ បានចំណាយទៅលើរបស់របរតែ២០%ភាគរយតែប៉ុណ្ណោះ។ ឩទាហរណ៍ ក្នុងមួយខែយើង ចំណាយ


៤០ម៉ឺនរៀល ក្នុងនោះ ៣២ម៉ឺនរៀលត្រូវបានចំណាយលើ កាហ្វេ និង​ អាហារថ្ងៃត្រង់។

ដូច្នេះ ដើម្បីកាត់បន្ថយការចំណាយ យើងត្រូវតែកាត់បន្ថយលើការញ៉ាំកាហ្វេ ឬ កាត់បន្ថយការចូលហាងថ្លៃៗដើម្បីញ៉ាំអាហារ។

២. ការគ្រប់គ្រងការសន្សំ៖

ដោយអនុវត្តនូវចំណុចទី១ យើងអាចបន្ថយការចំណាយលើ របស់របរ ២០%នោះ ហើយយកវាមកទុកសន្សំវិញ។

៣. ការគ្រប់គ្រងចំណូល៖

យើងអាចនិយាយបានថា ៨០%នៃចំណូលរបស់យើង​ គឺបានមកពី ២០%នៃការងារទាំងអស់ដែលយើង បានធ្វើ ឬ បានមកពី២០% នៃភ្ញៀវរបស់យើងទាំងអស់។ ប្រសិនបើយើង លក់ទំនិញ គេអាចនិយាយបានថា ៨០%នៃចំណូលរបស់យើង បានមកពីការលក់ទំនិញ ២០% នៃប្រភេទទំនិញទាំងអស់។ ដូច្នេះ យើងអាចផ្តោតលើការលក់ផលិតផលទាំងនោះអោយច្រើន ឬ ការយកចិត្តទុកដាក់លើភ្ញៀវដែលជាម៉ូយរបស់យើងអោយបានច្រើន។

Letsharekh សង្ឃឹមថា អ្នកអានទាំងអស់អាចចាប់បាននូវគោលគំនិតរបស់ទ្រឹស្តីនេះ ហើយយកទៅអនុវត្តនៅក្នុងការងាររបស់ខ្លួននីមួយៗ។ ប៉ុន្តែ សូមកុំគិតថា ទ្រឹស្តីនេះ វាអាចជួយយើងលើការគ្រប់គ្រងហិរញ្ញវត្ថុ ឬ ការងារផ្សេងៗបានទាំងអស់ ដូច្នេះ ទើបមានទ្រឹស្តីផ្សេងៗទៀតជាច្រើន ហើយ យើងនឹងចែករំលែកទៅអ្នកអានទាំងអស់គ្នានៅអត្ថបទក្រោយៗទៀត។ សូមកុំភ្លេចចែករំលែកទៅអ្នកនៅជុំវិញអ្នកអោយបានដឹងផងណា!