បំណុលអាក្រក់ បំណុលល្អ

ពូសុខជាអ្នករត់ម៉ូតូកង់បី ដែលមានចំណូលជាមធ្យមប្រហែល ១០ម៉ឺនរៀលក្នុងមួយថ្ងៃ។ គាត់រកបានច្រើនជាងមិត្តភក្កិរបស់គាត់ ដោយសារតែគាត់មានទំនាក់ទំនងល្អជាមួយម៉ូយ ហើយចេះយកចិត្តទុកដាក់ចំពោះម៉ូយរបស់គាត់។ គាត់រស់នៅផ្ទះជួល ជាមួយគ្រួសារគាត់ដែលមានគា្នសរុប ៤នាក់។ ក្នុងនោះ កូនក្នុងបន្ទុក មាន២នាក់ ប្រុស ១ ស្រី ១។ ជារៀងរាល់ថ្ងៃ គាត់ចំណាយប្រាក់ប្រហែល ៥ម៉ឺនរៀល សម្រាប់សាំង ម្ហូបអាហារ ចំណាយលើកូនទៅសាលា និង ចំណាយផ្សេងៗ។

ពូសុខគាត់ចូលចិត្តប្រើប្រាស់របស់ទំនើបៗដើម្បីមើលទៅអោយទាន់សម័យ ខុសពីប្រពន្ធរបស់គាត់ដែលចង់សន្សំលុយទុកសម្រាប់រកស៊ី ឬប្រើប្រាស់ពេលមានអាសន្ន។ នៅចុងខែតុលា ទូរស័ព្ទអាយហ្វូនជំនាន់ទី ៨ បានចេញលក់ក្នុងប្រទេសកម្ពុជាក្នុងតម្លៃប្រហែល ៨០០ដុល្លារ។ បច្ចុប្បន្ន ពូសុខប្រើទូរស័ព្ទ អាយហ្វូនសេវិន។

គាត់ចង់ទិញទូរស័ព្ទថ្មី ហើយគាត់ដឹងថាប្រពន្ធរបស់គាត់មានលុយ តែបើគាត់យកលុយទិញទូរស័ព្ទ នោះប្រពន្ធគាត់នឹងមិនអោយលុយគាត់ទេ។ គាត់បានឃើញក្រុមហ៊ុនផ្តល់កម្ចីឯកជនមួយ ដែលផ្តល់កម្ចី សម្រាប់ទិញទូរស័ព្ទ ដោយតម្រូវអោយគាត់បង់ប្រាក់ ៣០ភាគរយមុន ហើយសល់៧០ភាគរយ គាត់អាចបង់រំលោះជាមួយអត្រាការប្រាក់ ២% ក្នុងមួយខែ រំលោះរយៈពេល ២៤​ ខែ។ ពូសុខគិតថា គាត់អាចលក់ទូរស័ព្ទគាត់ប្រើបច្ចុប្បន្ន ដើម្បីបង់ប្រាក់ ៣០ ភាគរយ ហើយ គាត់ត្រូវចំណាយ ប្រហែល ២ម៉ឺនរៀលក្នុងមួយថ្ងៃ ឬ​ ៦០ម៉ឺនរៀលក្នុងមួយខែ សម្រាប់រំលោះ។ គាត់គិតថាគាត់មានលទ្ធភាពទិញវាបាន ដោយគាត់សល់ប្រាក់ប្រហែល៣ម៉ឺនក្នុងមួយថ្ងៃ អោយទៅប្រពន្ធគាត់។

និយាយពីប្រពន្ធពូសុខវិញ ជារៀងរាល់ថ្ងៃគាត់តែងតែមើលកាសែត ជួនកាលមើលហ្វេសប៊ុក ដើម្បីបានព័ត៌មានផ្សេងៗ ពិសេសព័ត៌មានអំពីការទិញ លក់ដី ឬ ផ្ទះជាដើម ព្រោះគាត់ចង់បានផ្ទះផ្ទាល់ខ្លួន ដោយសារបច្ចុប្បន្ន គាត់ត្រូវចំណាយលើថ្លៃឈ្នួលផ្ទះ ប្រហែល ៦០ម៉ឺនរៀលក្នុងមួយខែ។ មើលចុះ មើលឡើង គាត់ឃើញគេលក់ដីឡូត៍មួយកន្លែង ក្បាល ៥ម៉ែត ជម្រៅ ២០ម៉ែត ក្នុងតម្លៃ ១០លានរៀល។ អតិថិជនអាចបង់រំលោះប្រចាំខែ ចំនួន ៦០ម៉ឺនរៀលក្នុងមួយខែ រយៈពេល២០ខែ។ ប្រពន្ធពូសុខគិតថាគាត់មានលទ្ធភាពទិញដីនេះ ព្រោះវាធូរថ្លៃ ហើយគាត់មើលឃើញថា ដីនោះនឹងឡើងថ្លៃគុណនឹង២ ក្នុងកំឡុងពេល ២ឆ្នាំទៀត។

នៅពេលយប់ពេលពូសុខ មកដល់ប្រពន្ធគាត់បានប្រាប់គាត់ពីរឿងនេះ។ ពូសុខមិនមាត់ ក ហើយទៅគេងមុន។ ប៉ុន្តែគាត់គេងមិនលក់ទេ ព្រោះគាត់កំពុងគិតថា តើគាត់គួរតែទិញរបស់គាត់ស្រលាញ់ ឬ ទិញដីដែលប្រពន្ធគាត់ចង់បាន ព្រោះគាត់មានលទ្ធភាពអាចទិញបានតែមួយនោះទេ។

តើពូសុខគួរទិញទូរស័ព្ទ ឬ​ ក៏ដី? មួយណាជាបំណុលល្អ?មួយណាជាបំណុលអាក្រក់។

យោបល់ពីLet’share team៖

គោលបំណងនៃរឿងនេះ គឺចង់អោយអ្នកអានយល់ពីអ្វីដែលជាបំណុល អាក្រក់ និង បំណុលល្អ។ អ្នកអានប្រហែលជាអាចគិតឃើញពីគំនិតថ្មីៗផ្សេងពីនេះ។ ប្រសិនបើពូសុខយល់ពីអ្វីជាបំណុលល្អ និង បំណុលអាក្រក់ ដែលជាចំណេះដឹងហិរញ្ញវត្ថុ គាត់អាចធ្វើការសម្រេចចិត្តត្រឹមត្រូវ។ បំណុលល្អគឺជាបំណុលដែលជួយបង្កើតចំណូល(បច្ចុប្បន្ន ឬអនាគត) អោយអ្នកខ្ចី។ រីឯបំណុលអាក្រក់​ ជាបំណុលដែលបំផ្លាញប្រាក់ចំណូលរបស់យើង និយាយម្យ៉ាងទៀត វាជួយអោយយើងចាយលុយឥតប្រយោជន៍ ហើយនៅពេលអនាគត យើងនឹងមិនមានប្រាក់ចំនេញនោះទេ។

យ៉ាងណាក៏ដោយ បើប្រើប្រាស់បំណុលសម្រាប់យកទៅបំពេញតម្រូវការមូលដ្ឋានរបស់យើង នោះវាក៏ជារឿងល្អដែរ ប៉ុន្តែត្រូវចងចាំថា យើងមានលទ្ធភាពក្នុងការសងត្រលប់ទៅវិញ។